"Patróns SOLUCIÓNS para a Fundación Semana Verde XA"

Manifestación dos traballadores á entrada e saída dos asistentes á reunión do Padroado.

Contestación dos Traballadores

Contestación do Presidente nos taboleiros da Fundación

Comunicado de Prensa dos Traballadores da Semana Verde

Tralo comunicado oficial do Presidente da Fundación publicado o pasado venres día 14 de Decembro na páxina web da institución, os traballadores da Fundación vémonos na obriga de ter que informar sobre a situación que realmente se está a vivir nestes intres na Semana Verde.

Para elo, e con intención de dar total veracidade e imparcialidade á nosa información, queremos tomar como referencia principalmente o último informe do Consello de Contas e a Auditoría feita por Ernst &Young.

O Sr. Maril atrévese a afirmar, con idéntica rotundidade que no pasado mes de Xaneiro, que a Fundación non corre perigo de peche, que non ten débedas nin créditos, que ten un patrimonio de 90 millóns de euros e que os seus empregados recibirán puntualmente os seus salarios.

No último Informe de Auditoría, a empresa Ernst &Young indica a seguinte salvedade: “Os ingresos por actividades de explotación e aportacións de Patróns da Fundación e patrocinadores diversos manteñen unha tendencia decrecente, mentres que os gastos de explotación mantéñense en niveis similares, o que se traduce en que nos últimos exercicios se incurrise en perdas continuadas e significativas. Valoramos dita situación como indicativa dunha incertidume sobre a capacidade para continuar a súa actividade de forma que poida realizar os seus activos e liquidar os seus pasivos polos importes e según a clasificación con que figuran nas contas anuais adxuntas, que foron formuladas polos membros do Padroado, asumindo que tal actividade continuará, dependendo do apoio financeiro dos seus Patronos ou de terceiros”.

Queda manifestamente claro, indicado por unha empresa independente e especializada nestes temas, que os ingresos na actividade foron menguando, así como as aportacións dos Patronos, mentres que os gastos foron constantes, producíndose perdas continuas nos últimos anos.

Segundo o Informe do Consello de Contas, ata o ano 2006 (sendo este último unha previsión dado que está pendente a súa aprobación polo Padroado, xa que o Sr. Maril aínda non convocou a reunión obrigatoria que, por lei, se debería ter celebrado no segundo trimestre do ano), as perdas acumuladas neste últimos anos ascenden a 22,81 millóns de euros. Esta situación, segundo a propia empresa Auditora, é indicativa dunha incertidume sobre a capacidade da Fundación para poder xerar ingresos que lle permitan afrontar as súas obrigas de pago. E finalizan esta salvedade indicando que poderá continuarse coa actividade se existe un apoio financeiro externo, ou ben dos Patronos ou ben doutros terceiros.

Queda por tanto manifestamente claro, a incapacidade interna dos actuais xestores da Fundación para poder afrontar o futuro, mentres se siga a repetir o mesmo modelo de xestión, aportándose como única solución a da contribución externa ós déficits orzamentarios.

Tanto o Informe de Auditoría como o Informe do Consello de Contas analizan a implicación destas perdas reiteradas na evolución do Fondo Patrimonial, que arrinca cunha aportación fundacional dos Patronos de 45,62 millóns de euros, e que se ve reducido ata os 22,81 millóns de euros (un 50%), ata o ano 2006. E todo fai indicar unha evolución similar ou peor para o ano 2007. Estas cifras distáncianse moito das publicadas polo Sr. Maril, que cifraba o patrimonio da Fundación en 90 millóns de euros, cantidade que nos gustaría que nos explicase a nós e agradeceriamos que tamén ós seus propios auditores e ó Consello de Contas.

Ditas perdas tamén teñen a súa incidencia sobre a tesourería, que lóxicamente foi mermando nos últimos anos :

Ano	Tesourería	Reducción
2001	8.996.009 €
2002	7.375.547 €	-1.620.462 €
2003	6.221.862 €	-1.153.685 €
2004	5.033.940 €	-1.187.922 €
2005	3.361.246 €	-1.672.694 €
2006	1.803.909 €	-1.557.337 €

Estes datos, extraídos do Informe do Consello de Contas, mostran unha reducción da tesourería que se viu agudizada nos anos 2005 e 2006, e que de seguir nesta mesma progresión (e nada nos indica que non sexa así) prognostican outra reducción de aproximadamente 1,5 millóns de euros para o ano 2007, e indicarían unha situación de suspensión de pagos para o vindeiro trimestre de 2008. Estas previsións coinciden coa información interna coa que a Dirección da Fundación está traballando, e respalda as nosas afirmacións e dúbidas sobre a incertidume de poder cobrar os nosos salarios nun futuro próximo.

Este perigo foi denunciado no Informe do Consello de Contas, que veu respaldar a información anunciada polos Delegados de Persoal da Fundación no mes de Xaneiro do ano pasado, en relación co risco de suspensión de pagos que se podería producir na Fundación: “Esta tendencia da tesourería esixe medidas efectivas a curto prazo, que á vista das actividades dos últimos anos non parece que poidan esperarse da súa rendabilidade, con resultados económicos importantes e que, polo tanto, de non atenderse co recurso da financiación externa podería abocar á Fundación a verse incapacitada para facer fronte ás súas obrigas de pago xa dentro do exercicio 2007. O capital circulante tamén vén sufrindo unha minoración similar, o que impide asegurar a viabilidade da Fundación sen axudas externas a curto prazo”.

Esta situación pódese ver moito mais agravada polos litixios nos que nestes momentos está inmersa a Fundación. Por un lado a empresa constructora do recinto FCC, que reclama máis de 4 millóns de eurospor importes non abonados pola Semana Verde. E por outro lado a reclamación polas cantidades non abonadas ó Concello de Silleda en concepto de IBI (100.000 € anuais) e de IAE (10.000 € anuais), dos que a Fundación non ostenta a condición de exenta por ser o Presidente un cargo retribuído (condición indispensable para obter a exención e que se cumpre no resto dos recintos de Galicia). A modo de simple conclusión, poderiamos indicar que a permanencia do Sr. Maril no seu cargo está supoñendo a esta Fundación un custe anual de 215.000 € (105.000 € de salario, 100.000 € de IBI e 10.000 € de IAE).

Quixeramos mostrar unha vez mais, e a raíz da información da que dispoñemos e da cal queremos facer partícipe a calquera interesado, as nosas serias dúbidas sobre a capacidade da Fundación para poder facer fronte nun futuro moi próximo ás súas obrigas de pago, incluídas as retribucións salariais dos seus traballadores. Por todo elo, e dada a afirmación rotunda e reiterada do Presidente da Fundación de que os empregados desta casa seguirán a percibir os seus soldos puntualmente, gustaríanos que fixera públicos os seus argumentos, que contradin as conclusións formuladas por Ernst &Young e polo Consello de Contas. Argumentos dos que cremos que non dispón, ó non facelos públicos nin aceptar a reunión solicitada polos traballadores para coñecelos da súa propia persoa.

O resultado económico publicado para este ano 2007, cun beneficio neto na actividade dun millón de euros, é unha mostra máis da capacidade empregada polo Sr. Maril para mostrar nos medios de comunicación información sesgada e parcial, vendendo unha imaxe de tranquilidade e éxito profesional que se distancia moito da realidade. Este beneficio anunciado prodúcese única e exclusivamente pola celebración neste ano de múltiples oposicións convocadas polo Sergas e pola Consellería de Presidencia. Pero estas oposicións, que para nada se poden atribuír á xestión directa do Sr. Maril, senón a un feito puntual e ocasional da propia Administración que concentrou por diversos motivos grande número de probas nesta anualidade, non redundarán nin se repetirán en anos futuros. E foron os ingresos extraordinarios percibidos nesta actividade os que permitiron que non se producise no propio ano 2007 a anunciada incapacidade para facer fronte ós pagos anunciada polo Consello de Contas. De todas maneiras, e aceptando dito beneficio como posible, aínda que non atribuíble á xestión do Presidente da Fundación (que ultimamente se dedica a atribuírse como propias feiras organizadas por terceiros independentes e que reportan á Fundación réditos ridículos), estamos ante o anuncio dun beneficio neto na actividade, polo que aínda están pendentes de aplicar sobre esa actividade os custes indirectos xerados ó longo de todo o ano. A aplicación destes custes indirectos como amortizacións, mantemento, seguros, provisións, etc. vai levar a que se xenere un ano mais outro déficit nas contas anuais que voltarán a mermar o Fondo Patrimonial e a reducir a tesourería da Fundación.

E como solución a esta situación, e dado que non é moi probable a xeración de novos ingresos a través da actividade (reducida segundo o propio Consello de Contas nun 34% no número de expositores, nun 30% no número de visitantes, nun 28% nos ingresos de espacio e 28% na ocupación do recinto), faise obrigada a opción da financiación externa a través dos seus Patronos, claramente os pertencentes á Xunta de Galicia.

Pero esta financiación non se vén producindo, como ben di o propio Sr. Maril desde o ano 2000. E con motivo da deprimente situación arrastrada nos últimos anos, e en vista das posibles consecuencias que se prevén nun futuro moi cercano, os traballadores da Fundación vímonos na obriga de ter que informarnos directamente polos Patronos da Xunta de Galicia do motivo polo cal non se producían estas aportacións. Tanto o Conselleiro de Presidencia (en nome e representación dos membros pertencentes o PSdeG-PSOE) como o Conselleiro do Medio Rural (polo BNG), mostraron a súa postura de non contribuír con ningunha cuantía económica mais á Fundación (xa aportaron 62,40 millóns de euros) mentres se mantivese no cargo de Presidente o Sr. Maril, dado que a súa presencia imposibilita a aplicación dunha serie de medidas encamiñadas á profesionalización e reorientación da Fundación para convertelo no verdadeiro recinto feiral de Galicia.

A figura do Sr. Maril, opinión que mostramos non desde a nosa posición de traballadores da Fundación, senón a través dos propios comentarios dos Conselleiros de Presidencia e do Medio Rural, supón unha traba para o futuro desta Fundación. O Consello de Contas xa indicou a absorción de poderes que agora o Sr. Maril nega atribuírse aludindo á existencia dun cadro directivo no que delega a súa xestión.

A Xunta de Galicia, na búsqueda da profesionalización na xestión do Recinto Feiral (no que repetimos que invirtíu 62,40 millóns de euros), nomeou un Xerente, sobre o que o Consello de Contas comenta: “a función do Xerente na práctica foi desvirtuada pola asunción de competencias executivas propias deste cargo polo Presidente. En definitiva, o peso da xestión basculou de forma visible sobre a figura do Presidente que absorbe amplas facultades de xestión e administración por delegación do Padroado, e retén tódalas propias dos administradores ordinarios no manexo de recursos financeiros, da xestión de persoal, e en materias de organización e de contratación”. Queda manifestamente clara a absorción de poderes plenipotenciarios por parte do Presidente, que en ningún momento busca a profesionalización deste recinto feiral, senón a de perpetuarse no cargo, a pesares da falta de apoio do resto dos membros do Padroado.

Esta situación, que ata o de agora tiña difícil solución pola situación de bloqueo que ostentaba o propio Sr. Maril a través da Asociación Feiral, viuse liberada o pasado 21 de Novembro, coa facultade do Padroado (con maioría da Xunta de Galicia) para proceder ó nomeamento dun novo Presidente.

Queremos manifestar novamente que a intención dos traballadores desta Fundación é a de buscar o mellor futuro para este recinto feiral como única vía de conseguir o garante para os nosos salarios. Pero a situación acontecida nos últimos anos, e que se vén prolongando ata o día de hoxe, mostra un total distanciamento entre o Sr. Maril e a Xunta de Galicia.

O Sr. Maril mantén íntegro o seu instinto de supervivencia, e adoptou unha postura de non ceder a Presidencia gratuitamente. E a Xunta de Galicia, a pesares de ter a total capacidade para cesar ó Presidente, non quere adoptar medidas drásticas que provoquen mala imaxe política na zona do Deza e no resto da Comunidade Autónoma, mantendo unha postura de inmobilismo, á espera de que se produza a definitiva quebra económica da Fundación que obrigue ó Sr. Maril a ter que abdicar.

Os traballadores non buscamos a destitución nin o cese do Sr. Maril, senón só provocar unha situación de desbloqueo que permita un entendemento entre as partes para obter por fin unha solución que leve a situar a este recinto feiral na posición que realmente sempre debeu ocupar.

COMUNICADO DE PRENSA DO PRESIDENTE DA FUNDACIÓN SEMANA VERDE DE GALICIA, JOSÉ MARIL SÁNCHEZ

(este comunicado está publicado na web da Feira www.feiragalicia.com)

1.- A Presidencia da Fundación Semana Verde de Galicia vese na obriga de reiterar outra vez, e con idéntica rotundidade que no pasado xaneiro, que esta institución feiral non corre perigo de peche, nin en tres meses ni en ningún outro prazo.

Once meses despois, a Fundación segue sen ter débedas pendentes nin créditos en curso, e goza dun patrimonio superior aos 90 millóns de euros que asegura a continuidade da institución. Por iso, estou en condición de afirmar como presidente que todos e cada un dos empregados desta casa seguirán a percibir os seus soldos puntualmente.

2.- A Fundación Semana Verde de Galicia foi constituída fai 16 anos coa fin de liderar a proxección internacional do tecido empresarial e industrial galego. Sen embargo, a entidade non acaba de cumprir este obxectivo, tal e como veño manifestando tanto en intervencións públicas como nas reunións do Padroado. Dúas son as causas principais que conduciron a esta situación:

· A proliferación de recintos feirais en Galicia e o solapamento de feiras adicadas a un mesmo sector que se canibalizan entre si e impiden que o noso país conte con certames especializados con envergadura suficiente para proxectar con forza estos sectores nos mercados exteriores.

Un exemplo notorio desta “competencia feroz” prodúcese no turismo, respecto do cal Galicia foi escenario de 4 salóns distintos nun período de só 35 días: Ferpalia (Vilagarcía: 29 de setembro a 2 de outubro), Turisport (Silleda: 18 a 21 de outubro), Termatalia (Ourense: 19 a 21 de outubro) e Expogalaecia (Vigo: 31 de outubro a 2 de novembro).

· A Fundación non recibe aportacións ao orzamento ordinario de mans dos seus patróns dende o ano 2000, sendo as dos dous últimos exercicios (anos 1999 e 2000) inferiores en máis dun 50% ás anteriores. E aínda que a Xunta obtivo en 2002 e polo seu propio desexo a maioría no Padroado en detrimento da Asociación Feiral -de tal xeito que fose o Goberno Autonómico o que liderase e abanderase os proxectos feirais-, seguimos na mesma situación.

Un dato significativo neste senso é que –pese a que a eficacia da nosa xestión está máis que demostrada ao revertir cada euro público destinado á Fundación 25,6 euros ao conxunto de Galicia, segundo reflexa un estudo elaborado pola consultora madrileña Inmark, S.L.- dos 81,84 millóns de euros investidos durante estes 16 anos en actividade, persoal e mantemento do recinto, só 15,51 millóns (é dicir, un 18,95% do total) foron subministrados polos patróns a través de aportacións ao orzamento ordinario, tendo que asumir a Fundación a diferenza restante cos seus propios recursos. E aínda así –suliño outra vez- non lle debemos cartos a ninguén.

Como consecuencia deste esforzo, vémonos imposibilitados de realizar os necesarios investimentos en promoción do recinto feiral que nos permitan competir en igualdade de condicións con outras instalacións que cumpren idéntico papel ao noso nas súas Comunidades Autónomas (IFEMA en Madrid, FIRA en Barcelona, BEC en Euskadi…), o que redunda na mingua da competitividade de Galicia.

Así e logo, para que o recinto poida cumprir por fin o seu papel faise necesaria a implicación económica e sobre todo política de todos aqueles patróns da Fundación realmente comprometidos cos nosos fins. Moi en especial, dos pertencentes á Xunta de Galicia por ostentar a maioría absoluta no seo da entidade. De igual xeito, estaríamos moi gustosos de incluír no Padroado a outras entidades que se identifiquen con este proxecto, como é o caso coñecido do Concello de Santiago de Compostela.

Sería desexable tamén unha coordinación feiral a nivel autonómico que propiciase que cada recinto galego cumpra a súa función, sendo a que nos corresponde liderar a internacionalización dos sectores básicos para Galicia.

Con estas premisas, unha ocupación plena do recinto acollendo eventos feirais con dimensión internacional e outras actividades dependentes da Xunta -no en van éste é o seu parque feiral- que precisen dunhas infraestruturas como as que hai aquí (caso das oposicións que se levan realizando dende xuño de 2001), permitiría acadar a medio prazo a autofinanciación, de tal xeito que non nos sería necesaria no futuro ningún tipo de subvención.

3.- A Fundación fixo un importante esforzo para manter, con cargo aos seus propios fondos de tesourería e dentro dunha política de lóxica austeridade ante a problemática exposta, todas aquelas actividades que redundan no desenvolvemento socioeconómico de Galicia. E teño a convicción de que a xestión foi irreprochable neste sentido:

· Entre as feiras que a Fundación en 2007 organizou ou coorganizou (laboriosa tarefa que xustifica en gran parte que un total de 83 traballadores dependan directa ou indirectamente de aquela), a 30ª Feira Internacional Semana Verde de Galicia (co seu salón paralelo Salimat) e, especialmente, a terceira edición de Cimag xeraron uns resultados económicos moi satisfactorios. Non así a 16ª edición de Turisport, pero a súa continuidade foi tomada por consideracións estratéxicas, pois non cedemos no noso empeño de posicionar unha feira que –iniciada en 1992- foi a primeira en Galicia en adicarse ao turismo, e que se viu prexudicada pola aparición posterior doutras tres que inciden no mesmo sector.

· A Lonxa Agropecuaria de Galicia que promove e organiza a Asociación Feiral Semana Verde coa colaboración da Fundación está consolidada xa –grazas a súa fórmula de subasta que garante a total transparencia e obxectividade nas transaccións comerciais- como un instrumento clave para a comercialización do sector gandeiro de Galicia, beneficiando sobre todo ás pequenas explotacións. Así, a subasta moveu no que vai de 2007 un total de 64.229 animais e facturou 23.958.631 euros: cifras que se puderon lograr despois de moitos anos de esforzo ata convencer ao sector da eficacia deste modelo innovador que é único en España. Pese a que dende a súa creación en 1981 investíronse máis de tres millóns de euros na súa posta en marcha e xestión de funcionamiento, aínda hoxe segue sendo totalmente gratuíta para os seus usuarios.

· Este ano foi escenario dun novo proxecto feiral -o Salón Internacional Galego de Automoción (Siga)- no que se aunaron a vontade do sector por organizar un evento especializado coa contrastada experiencia feiral que atesoura a Fundación. Esta fórmula de colaboración público-privada é a que mellor garante a consolidación dun proxecto feiral, e non só proseguirá en 2008 coa segunda edición de Siga, senón que se intensificará coa celebración do Primeiro Salón Náutico de Galicia, organizado co noso apoio pola Asociación Galega de Empresas Náuticas (Agen). Estes dous eventos -ademais dunha nova Feira de Camping-Caravaning coincidente cunha Acampada Nacional que reunirá aquí a máis de 4.000 campistas- apenas van ter custos significativos para a Fundación e si producirán beneficios.

Como consecuencia destas e doutras accións (ata alcanzar este ano un total de 224 días de ocupación a través de 147 actividades) a Fundación vai obter por primeira vez na súa historia beneficios netos na actividade, cun superávit previsto para 2007 superior ao millón de euros.

4.- A Asociación Feiral Semana Verde de Galicia foi xerme e promotor de valiosísimos proxectos que repercutiron decisivamente no avance do mundo rural do noso país. É o caso da antes mencionada Lonxa Agropecuaria de Galicia e é o caso tamén da Feira Internacional Semana Verde de Galicia, que foi iniciada en 1978 pola Asociación Feiral cando o sector agrario estaba vapuleado e que ésta logrou impulsar con recursos modestos ata dotala en 1988 de cualificación internacional (otorgada pola Secretaría de Estado de Comercio) e integrala en 1991 na Unión de Feiras Internacionais (UFI), que aglutina aos certames profesionais máis importantes do mundo. Aínda hoxe, ningunha outra feira galega forma parte deste último organismo.

Non menos salientable é que –segundo recolle a acta constitutiva da Fundación de 1991- a Asociación aportou 278.443 metros cadrados de terreo para que puidese ser construído o parque feiral no que nos atopamos. É dicir, o 63,2% da superficie total do recinto.

En consecuencia, como presidente da Asociación Feiral Semana Verde de Galicia debo velar polos intereses desta entidade, pois así o prometín aos cerca de 4.000 socios que a compoñen e que me transmitiron cos seus votos a súa confianza ao longo destes 30 anos. Eles son parte fundamental do que se conseguiu e por iso mesmo deben ter un peso específico no futuro do recinto feiral.

5.- En canto a miña situación profesional, non me considero un escollo para ninguén e a miña vontade de colaborar segue a ser absoluta con todos e cada un dos patróns que integran a Fundación.

O futuro dos traballadores da Fundación sempre foi para min unha prioridade, segundo tiven oportunidade de manifestar a alguns dos responsables da institución, tanto de forma verbal como por escrito.

En ningún intre arrogueime poderes plenipotenciarios, como o testemuña o feito de que esta entidade contase con tres xerentes (un aínda en activo) que foron aprobados polo propio Padroado e que desempeñaron as tarefas inherentes ao seu cargo. De igual xeito, o organigrama da Fundación dispón na actualidade dun equipo directivo do que forman parte –ademais do devandito xerente- un director económico-administrativo, un director de infraestruturas e servizos, e un secretario xeral, todos eles coas súas atribucións correspondentes.

Non é certo que eu non teña que rendir contas a ninguén. De sobra é sabido que a xestión efectuada dende a Fundación é analizada polo miúdo en cada unha das dúas reunións ordinarias anuais do Padroado.

Por último, teño plena confianza en que a vindeira reunión do Padroado da Fundación contribuirá a disipar as inquedanzas que poidan existir sobre o futuro da entidade.